كيف تربي طفل واثق في نفسه

 معظم الأمهات يكاد يكون كلهم بيعانوا من مشكلة الطفل العصبي كثير الزن ، أو الطفل العنيد اللي مش بيسمع الكلام بسهولة .

و دي مشكلة مرهقة ليهم كلهم و بتحسسهم و كأن خلاص ؛ مفيش فايدة مع الطفل ده و لا عمره هيسمع الكلام و أقدر أسيطر عليه .. بس ده كلام مش صحيح لأن كل مشكلة ليها حل ، و مشكلة الطفل العصبي بسيط حلها بس مع الأم الشاطرة ، الذكية ، و اللي عارفة تفهم طفلها بجد.

^طب نيجي الأول لأسباب المشكلة.

أسباب عصبية الأطفال :

1- التجاهل: هو أن يكون أنتي بتتجاهلي طفلك و دائماً بتحسسيه أن رأيه مش مهم ، و كل ما يسألك عن حاجة تتفهي منه و تقوليله،( شوية كده) .. (بعدين بعدين) ،( أنت كمان بتتكلم و تقول رأيك زي الكبار !)

كل ده بيحسسه أنه مش لافت نظرك ف بيبدأ يتعصب و يعند معاكي عشان يلفت نظرك له .

2- التدليل الزائد: لما كل شيء يطلبه طفلك تنفذيه مهما كان و مفيش ليكي رأي شخصي عليه ، أو إلزام بشئ معين أو بمعني أصح ( مش بترفضي له طلب ) 

ده بيخلي طفلك هو اللي يملكك و يعرف نقطة ضعفك لأنه الأطفال ذكية جداً و كده خلاص هو عرف هياخد اللي عاوزة إزاي.. لما يزعق و يصرخ لأنه عارف أنه كده كده هتنفذي له طلبه.

3- الأم العصبية : الأم العصبية ممكن تكون هي السبب نفسه ف أن لطفلها يكون عصبي و عنيد و واحدة من الأسباب الأساسية لمشكلة ( الطفل العصبي ) ، الطفل هو مرآة والديه يعني كل صفة عايزة طفلك يكتسبها .. أعمليها 

عايزة إبنك عصبي اتعصبي ، عايزة إبنك هادي أنتي كمان اهدي ، طفلك طلع مش شايف غير أن دي الطريقة الوحيدة المستخدمة في البيت للتعبير عن الغضب و أنه عايز حاجة معينة لأن شايف أمه نفسها بتعمل كده .. طبيعي هيقلدك لأن الطفل زي الأسفنجة و هو مرايتك زي ما قولتلك .

4- الغيرة من الأخ الأصغر: لو رُزقتي بطفل تاني بعد طفلك العصبي ، ف غالباً هتلاحظي أن طفلك أتغير شوية و بقى بيعمل سلوكيات مش طبيعية زي العصبية الزيادة،

يا أما بيعمل كده عشان هو بطبعه عصبي بسبب الأسباب السابقة ، أما هو دي مش طبيعته لكنه مضطر يعمل كده عشان يلفت انتباهك بس و يقولك (أنا موجود ) ، ساعتها لازم تشاركيه معاكي في احتياجات الطفل التاني و تحسسيه أنه جزء مهم في تربية طفلك التاني و أنه هو الحب الأول مهما كان و خليه يحس أنك مركزة معاه زي البيبي التاني بالظبط .

5- انفصال الأبوين : انفصال الأب و الأم و ابنهم / بنتهم لسه في عمر الطفولة ، ده بيخليهم يحسوا بوحدة و فراغ جواهم و أنهم غير باقي أقرانهم ، فمفيش حل قدامهم غير لفت انتباه من حوله عشان يملوا الفراغ اللي حصل ب أنه هو يتعصب و يزعق و كمان بيوصل للعنف و ضرب زملائه في المدرسة .

* نيجي بقى لعلاج مشكلة الطفل العصبي 

حل مشكلة الطفل العصبي و التعامل مع الطفل العصبي : 

1-  المدح:

دائماً أمدحيه و قوليله كلام معسول و لطيف على كل السلوكيات الجيدة اللي بيعملها ، و قولي له شاطر برافو عليك / أنت عرفت تعمل الحاجة دي النهارده أشطر من أي مرة أنت اتحسنت عن قبل كده أوي / أنت تستاهل صقفة و بوسه كبيرة بعد ما عملت اللي قولتلك عليه ده .. و غيره من الكلام الإيجابي.

2- المكافأة :

كافئيه على الأفعال الإيجابية اللي بيعملها ، ده بيحسسه أنه عمل إنجاز و فخور بنفسه ، مش شرط تكون حلويات لأن طبعاً دي عادة سيئة و ممكن تسببله مشاكل صحية .. ممكن تكون أداة مدرسة أو هدية كان نفسه فيها .

3- التعبير عن المشاعر :

خليه يعبر عن مشاعره و اسأليه ( زعلان ليه بس قولي حاسس ب إيه) ، ( طب قولي مشاعرك ايه دلوقتي بعد ما ده حصل - لو حاجة معينة زعلته -) و هكذا .. ده بيخليه يفضفض و يشكي زعله عشان يخف الضغط اللي بيحطه في نفسه و ده بيؤدي للعصبية .

4- الاحتضان و الاحتواء: 

بعض الأهالي فاكرين أن حضن الطفل أو تقبيله هو دلع و أن كده هنعوده على الدلع و أنه يكون ضعيف كده!

لكن ده مش حقيقي ، الحضن دي حاجة ليها مفعول سحري لتخفيف العصبية لدي الأطفال ، احضني طفلك و حسسيه و عرفيه أنك جنبه و بتحبيه حتى و هو زعلان و عصبي ، خصوصاً أخر نقطة دي لأن الطفل العصبي دائماً فاكر أن محدش بيحبني و كله بيتعصب مني و بيزعق لي ،. متخليش فكرة زي دي تيجي في دماغه أصلا.. و بلاش جملة ( أعمل كذا عشان أحبك ) ، لأن جملة قاااتلة و الأمهات مش واخدة بالها لأنك بتربطي حبك له بحاجة و كأنه مشروط!.

 5- عدم التوبيخ و الصراخ في الطفل :

رد العصبية بالعصبية و العند بالعند مش حل ... لأ بالعكس كده المشكلة بتسوء أكتر ، الهدوء أهم شيء في حل مشكلة الطفل العصبي و الطفل العنيد ، اهدي و قوليله ( براحة محدش بيتكلم كده وطي صوتك عشان أفهمك يا حبيبي) / ( أنا مش سمعاك كويس وأنت بتصرخ وطي صوتك لو سمحت ) / ( طب أنت شايف أن الزعيق هو الحل دلوقتي ؟ أحنا كده مش هنعرف نحل المشكلة! ) .. و هكذا من الردود الهادية و الحكيمة .

الطفل العصبي ذكي جداً و حساس لازم تكوني ذكية و حكيمة و واعية في التعامل معاه ، و متقلقيش فترة بتيجي لكل الأطفال و بيعدوا بيها في النهاية بشطارتك و وعيك مع طفلك ♥️